ЯҢАЛЫКЛАР

Бүген Алабуга мунициципаль районы «Алабуга» махсус икътисадый зонасы территориясендә төзелеш (лист) пыяласы җитештерү буенча яңа «Тракья Гласс Рус» заводын һәм автомобиль пыяласы җитештерү буенча «Аутоматив Гласс Альянс Рус» заводын эшләтеп җибәрү тантанасы узды. Чарада Татарстан Республикасы Президенты Рөстәм Миңнеханов һәм Төркия Икътисад министры Нихат Зәйбәкҗи катнашты. 

«Тракья Гласс Рус» – «Sisecam» («Шишеджам») Төркия компаниясе белән «Saint-Gobain» («Сен-Гобен») француз компаниясенең уртак проекты. Завод төзелеш (лист) пыяласы, көзгеләр һәм өслекле пыял, җитештерү белән шөгыльләнә. Инвестицияләрнең гомуми күләме 7 млрд. сум. 250ләп эш урыны булдырылган. Бер ел эчендә 250 мең тоннага кадәр продукция чыгару планлаштырыла. 

Рөстәм Миңнеханов «Тракья Гласс Рус» җитәкчелеген яңа завод ачылу белән котлады, бүген Татарстан Төркия компанияләре белән актив хезмәттәшлек итә, дип белдерде ул.    

«Соңгы елларда республикада импортны алмаштыруга юнәлгән берничә заманча югары технологияле предприятиеләр эшли башлады. Без үз ягыбыздан   әлеге проектларга ярдәм күрсәтәбез. Төркия партнёрларыбыз белән гамәлгә ашырырга җыенган проектларыбыз күп», - диде ул.  

Рөстәм Миңнеханов билгеләп үткәнчә, Россия белән Төркия арасында аңлашылмаучылык булуга карамастан, бу илләр башлыкларына каршылыкларны җиңеп чыгу мөмкин булды. Бүген безнең Төркия компанияләре белән киләчәк уңышлы эшләребез өчен мөмкинлекләребез бар, диде Татарстан Республикасы Президенты. 

Нихат Зәйбәкҗи билгеләп үткәнчә, Татарстанда бу яңа заводны ачу сыман  чаралар Россия-Төркия мөнәсәбәтләрен ныгытуга этәргеч була. Аның сүзләренчә, ноябрьдәге фаҗигале вакыйгалардан соң Татарстан Республикасы Президенты Рөстәм Миңнеханов илләр арасындагы хезмәттәшлекне торгызу өчен зур көч куйды.   

«Мондый конфликтлар ике якка да зыян сала, чөнки үзара инвестицияләрне үстерергә кирәк, - дип саный Нихат Зәйбәкҗи. – Төркия Икътисад министры үз җитештерүләрен Татарстан һәм Россиянең башка төбәкләре территориясендә урнаштырырга теләгән инвесторларга һәрвакыт ярдәм күрсәтә. Без Төркиягә үз капиталы белән килергә теләгән Россия компанияләре эшчәнлеген хупларга әзер». 

Ул шулай ук ассызыклаганча, Анкара элеккегечә үк «Төркия агымы» газ үткәргечен һәм беренче «Аккүй» Төркия АЭСын төзү проектларын хуплый.

Тантанадан соң Рөстәм Миңнеханов һәм Нихат Зәйбәкҗи яңа предприятиенең җитештерү линияләрен карап чыктылар һәм әзер продукция үрнәкләре белән таныштылар.

ТР Президенты Матбугат хезмәте, Булат Низамиев.

Татарстан Республикасының төзелеш өлкәсендә бәхетсезлек очраклары саны узган елның шул ук чоры белән чагыштырганда кимегән. Үлемгә китергән бәхетсезлек очраклары 5 кә кимегән, авыр җәрәхәтләргә китергәннәре сигезгә кимегән. Бу хакта бүген ТР Хөкүмәте Йортындагы республика киңәшмәсендә ТР төзелеш, архитектура һәм ТКХ министрының беренче урынбасары Алексей Фролов хәбәр итте. 

Киңәшмәне барлык районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды. Киңәшмә эшендә ТР Премьер-министры Илдар Халиков катнашты. 

Алексей Фролов искәрткәнчә, ТР Дәүләт төзелеш күзәтчелеге инспекциясе һәм хезмәт инспекциясе тарафыннан 2016 ел башыннан 861 тикшерү үткәрелгән, 15 млн. 585 мең сумга 404 карар чыгарылган. "Татарстан Республикасы төзүчеләр берлеге" үзен-үзе җайга салу оешмасы әгъзалары булган 626 оешманы тикшергән. 

Күп фатирлы йортларны капиталь ремонтлау эшләре бөтен объектларда алып барыла. ТР Дәүләт торак инспекциясе мәгълхматлары буенча 690 күп фатирлы йортта эшләр тәмамланган. Алардан Дәүләт торак инспекциясе тарафыннан 183 объект кабул ителгән. 

Алексей Фролов хәбәр иткәнчә, 2016 елда 95 гомуми белем мәктәбен, шул исәптән 15 коррекцион мәктәп, шулай ук 53 мәктәпкәчә белем бирү оешмасын ремонтлау каралган иде. 6 октябрь көненә эшләр 1 объектта алып барыла (Казанның Киров районындагы гимназиядә). Фролов искәрткәнчә, капиталь ремонт эшләре укыту процессына уңайсызлык китерми. Калган 79 объектта капиталь ремонт тәмамланды. 

2016 елда мәдәният объектларын капиталь ремонтлауга килгәндә, 43 мәдәният учреждениесеннән 7 октябрьгә 1 объектта гына эшләр алып барыла, калган 42 объектта эшләр тәмамланды. 

Республикада яшүсмерләр клубларында, муниципаль берәмлекләр советлары биналарында, социаль хезмәт күрсәтү объектларында капиталь ремонт эшләре тәмланган (2016 ел программасы буенча).

Алексей Фролов торак йортларга һәм бюджет өлкәсе объектларына җылылык бирү турында да хәбәр итте. Җылылык бирү 2016 елның 13 сентяберендә башланды. Муниципаль берәмлекләр мәгълүматлары буенча 2016 елның 7 октябрь көненә җылылык 3 мең 208 котельняда бирелә башлаган (99,97 %). Бүгенгә Казанда Девятаев урамында 1 котельня эшләтеп җибәрелмәгән, Порт урамында ике йорт җылысыз тора. 

Рөстәм Миңнеханов җылылык бирү мәсъәләсен махсус контрольгә алырга йөкләде һәм кыска вакытта мәсьәләне хәл итүне таләп итте. 

ТР Президенты Матбугат хезмәте. Елена Бритвина

1 октябрьдә, Татарстан Республикасы Дәүләт төзелешен күзәтү Инспекциясе хезмәткәрләре республика күләмендә ел саен оештырыла торган “Урман утырту көне” табигатьне саклау акциясендә катнашты. 

Татарстанда Россиядәге иң зур төзелеш кластеры булдырылачак. Бүген Татарстан Сәүдә-сәнәгать палатасында аның згъзаларының беренче җыелышы узды.

Очрашуда Татарстан төзелеш, архитектура һәм ТКХ министрының беренче урынбасары Алексей Фролов соңгы ун елда Татарстанда төзелеш актив үсеш ала, тармакның потенциалы зур дип билгеләп үтте. Казан инфраструктурасын әзерләү белән бәйле соңгы чаралар сәнәгать үсешенә, яңа технологияләр кертүгә этәргеч булды. Бүгенгә республикада 500 дән артык төзелеш оешмасы эшли.

Кайбер территорияләр төзелеш материаллары производстволары белән тулы, нәтиҗәдә предприятиеләрнең бер өлешенең үсеше чикләнгән, дип билгеләп үтте министр урынбасары. Кластер формалаштыру кече бизнесны үстерүгә, тармакка инвестицияләр җәлеп итүгә, бөтен предприятиеләрне эшләтүгә юнәлдерелгән. Бөтен предприятиеләр якындагы 5-10 елга эшчәнлекләрен планлаштырып үсеш программасы формалаштырачак дип көтелә. Кешелек капиталына зур роль биреләчәк. Яшь буынны әзерләү белән уку кластерлары шөгыльләнәчәк. Шулай ук сәнәгать белгечләренә, производстволар, хезмәт сагына җитди игътибар бирү зарур булачак.

«Сувар Девелопмет» компаниясенең генераль директоры Андрей Мочалов билгеләп үткәнчә, төбәк дәрәҗәсенең күрсәткечләренең берсе - төзелеш тармагы. Аның фикеренчә, җитештерү комплекслары арасында элемтә булдыру зарур. Кластерда катнашучылар профиль министрлыклары белән бергә эшләгән очракта үз производствосы чыгымнарын компенсацияләү мөмкинлеген ала.

"Безнең максат - түбән бәядән материаллар сатып алу, бу төзелеш үзкыйммәтен төшерү мөмкинлеген бирә, нәтиҗәдә күчемсез милек квадрат метры арзанаячак. Бөтен структуралар белән бергә команда булып эшләгән очракта гына үз предприятиебез эшен яхшырта һәм республиканы яңа дәрәҗәгә чыгара алабыз", - дип билгеләп үтте А. Мочалов.

«Кама кластер үсеше үзәге» коммерцияле булмаган автоном оешма җитәкчесе Ленар Әхмәтов кластер үсеше концепциясен презентацияләде.

Очрашу азагында кластерны формалаштыру концепциясен кабул иттеләр, Татарстан Республикасы Төзелеш кластерының сәнәгать эшчәнлегендә катнашу турында «СД кластер» ҖЧҖ махсус оешмасы белән килешү имзаладылар. Килешүгә 25 компания имза салды.

МА "Татар-информ"

атарстанда Дәүләт төзелеш күзәтчелеге инспекциясе һәм Татарстан Республикасы Дәүләт хезмәт инспекциясе тарафыннан 2016 ел башланганнан бирле техник иминлек җәһәтеннән 861 тикшерү уздырылган. Хезмәтне саклау кагыйдәләрне һәм нормаларны бозган өчен 15,6 млн. сумга 404 карар чыгарылган.

Бүген бу хакта Татарстан Республикасы төзелеш, архитектура һәм ТКХ министры Ирек Фәйзуллин Татарстан Республикасы Хөкүмәте Йортында узган республика киңәшмәсендә хәбәр итте. 

Киңәшмәне барлык мунициципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды.

Анда шулай ук Татарстан Республикасы Премьер-министры вазыйфаларын башкаручы Алексей Песошин да катнашты. 

Ирек Фәйзуллин хәбәр иткәнчә, 2016 елның 30 сентябренә Татарстанда 1 млн. 732,7 мең кв. м. торак файдалануга тапшырылган (үткән елның шушы чорына карата 103 %)

Социаль ипотека программасы буенча гомуми мәйданы 181,9 мең кв. метр булган 3 мең 154 фатирлы 79 йорт гамәлгә кертелгән.

Программаның 114 төзелүче объектыннан 90 объект әзер диярлек, уртача әзерлектә –18 объект, 6 объектта эшләр күп әле.

Республикада Бөек Ватан сугышы ветераннарының торак шартларын яхшырту программасы кысаларында 157 ветеран өчен 24 йорт төзелә.

Ятим балаларның һәм ата-ана каравыннан мәхрүм калган балаларның һәм алар арасыннан булган затларның торак хокукларын гамәлгә ашыру программасы буенча Татарстан Республикасы Җир һәм мөлкәт мөнәсәбәтләре министрлыгы 331 ятим балага торак урыннарын бирү өчен сату-алу дәүләт контрактларын төзүгә торглар уздыру буенча документлар  пакетын әзерләгән. 1 октябрьгә 20 торак урыны ДТФда теркәлгән; 51 торак урыны Татарстан Республикасы милкенә сатып алынган, шулардан 50 се махсуслаштырылган торак фонды наемы шартнамәсе буенча ятим балаларга бирелгән. 

5 һәм аннан күбрәк баласы булган гаиләләрне торак белән тәэмин итү программасы буенча бүгенгә рәсмиләштерелгән 42 сертификаттан 19 сертификат реализацияләнгән.

Моннан тыш, 2016 елда республикада 81 яшь гаилә торак белән тәэмин ителгән.

2016 елның 1 октябренә Татарстанда социаль-мәдәният объектлары төзү буенча 4 республика программасы тулы күләмдә гамәлгә ашырылган. Болар: авыл клублары төзү программасы, Татарстан Республикасында беренчел медик-санитар ярдәм объектларын модернизацияләү программасы, участок ветеринария пунктларын төзү һәм ветеринария берләшмәләренә һәм авыл хуҗалыгы идарәләренә ремонт, муниципаль районнарда универсаль спорт мәйданчыклары төзү программасы.

ТР Президенты Матбугат хезмәте, Елена Бритвина.

Алабуга шәһәрендә Кече Покровский урамында урнашкан , 3 нче һәм 4-нче номерлы ике 60 фатирлы “Гражданнарны авария хәлендәге торак фондыннан күчерү”  программасы буенча төзелгән торак йортлар төзелеше тәмамлана. Генераль подрядчы – "СтройСервис" ЯАҖ.

Бүген ТР Дәүләт төзелешен күзәтү Инспекциясе тарафыннан тикшерү төгәлләнде, инспектор тикшерүе нәтиҗәләре буенча кайбер кисәтүләр ачыкланган. Кисәтүләр төзәтелгәннән соң, йомгаклау  тикшерүе  үткәрелә, шуннан соң  социаль программалар буенча төзелгән фатир ачкычлары хуҗаларына тапшырылачак.

Хәзерге вакытта тагын ике йорт төзелеше дәвам итә, аларны киләсе елга тәмамларга планлаштырыла.

2016 елның 3 июлендә № 372-ФЗ “Россия Федерациясе шәһәр төзелеше кодексына һәм Россия Федерациясенең аерым закон актларына үзгәрешләр кертү турында" Федераль закон кабул ителде. Закон төзелеш өлкәсендә  хокукый җайга салу тармагында  җитди үзгәрешләр кертелде, бигрәк тәүз  эшчәнлеген җайга салучы оешмалар һәм әгъзаларының мөнәсәбәтләрен тәртипкә өлкәсендә.

Үзгәрешләр белән тулырак биредә танышырга мөмкин

Бүген Татарстан Республикасы Президенты Рөстәм Миңнеханов Россия Федерациясе Төзелеш һәм ТКХ министры урынбасары Андрей Чибис белән очрашты. 

Очрашу Рөстәм Миңнехановның Татарстан Республикасы Хөкүмәте Йортындагы эш кабинетында узды.   

Әңгәмә барышында яклар шәһәр тирәлеген үстерү өлкәсендәге үзара хезмәттәшлек мәсьәләләре турында фикер алыштылар. 

Искәртәбез, бүген Андрей Чибис республикада «Парклар һәм скверлар» һәм «Су саклау зоналары» программаларын гамәлгә ашыруга багышланган киңәшмәдә катнашачак. 

Моңарчы Россия Федерациясе Төзелеш һәм ТКХ министры урынбасары Татарстан Республикасының берничә районы өстеннән очып узды һәм җәмәгать киңлекләрен төзекләндерү буенча башкарылган эшләр нәтиҗәләре белән танышты.    

ТР Президенты Матбугат хезмәте

Татарстан Республикасында 2016 елның 16 сентябренә 1 млн. 626,7 мең кв. м. торак файдалануга тапшырылган, бу үткән елның шушы чорына карата    100,3 % тәшкил итә. Бүген бу хакта Татарстан Республикасы Хөкүмәте Йортында уздырылган республика киңәшмәсендә Татарстан Республикасы төзелеш, архитектура һәм ТКХ министры Ирек Фәйзуллин хәбәр итте. 

Киңәшмәне барлык мунициципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды. Анда шулай ук Татарстан Республикасы Премьер-министры Илдар Халиков та катнашты.  

Татарстан Республикасы төзелеш, архитектура һәм ТКХ министры искәрткәнчә социаль ипотека программасы буенча республикада гомуми мәйданы 181,9 мең кв. метр булган 3 мең 154 фатирлы 79 йорт файдалануга тапшырылган. Программаның 114 төзелүче объектыннан 85 объект әзерлеге югары дәрәҗәдә; уртача дәрәҗәдә – 23 объект; 6 объектта эшләр бик күп әле.

2016 елга аренда торагы программасы буенча 14,4 мең кв. метр мәйданы булган 22 торак йорт гамәлгә кертелгән.

Ятим балаларның һәм ата-ана каравыннан мәхрүм калган балаларның һәм алар арасыннан булган затларның торак хокукларын гамәлгә ашыру программасы буенча 2016 елның 17 сентябренә Татарстан Республикасы торак алучылар исемлегенә быел 311 кеше кертелгән, 20 торак урынына ДТФ милекчелеге хокукы теркәлгән, торак урыннарын республика милкенә тапшыру акты имза салу стадиясендә. Моннан тыш, 51 торак урыны Татарстан Республикасы милкенә сатып алынган, шуларның 48е махсуслаштырылган торак фонды наемы буенча ятим балаларга бирелгән.

5 һәм аннан да күбрәк баласы булган гаиләләрне торак белән тәэмин итү кысаларында рәсмиләштерелгән 42 сертификатның 12се гамәлгә ашырылган.

2016 елда Татарстан Республикасында 81 яшь гаилә торак белән тәэмин ителәчәк.

Күп фатирлы инвестицион торак программасы буенча 41 йортның 29ы әзер диярлек, уртача әзерлектә - 12 йорт.

Аз катлы төзелеш өлешендә, индивидуаль торак төзелешен дә кертеп,  республика буенча 9 мең йорттан 6 мең 633 эксплуатациягә кертелгән.

«2016 елга авыл клублары» программасы буенча 16 сентябрьгә 45 объектның 44ендә эшләр төгәлләнгән. Ирек Фәйзуллин хәбәр иткәнчә, бер калган объект та тәмамланып килә (Казандагы Чыңгыз поселогы).

Татарстан Республикасы төзелеш, архитектура һәм ТКХ министры шулай ук  участок ветеринария пунктларын төзү, сәламәтлек саклау учреждениеләренә ремонт, модульле фельдшер-акушерлык пунктлары (ФАП) төзү һәм төзелеш өлкәсендәге башка программаларны гамәлгә ашыру турында сөйләде.   

Аерым алганда, «Универсаль спорт мәйданчыклары төзү» программасы   2016елның 16 сентябренә күрсәткечләр буенча тәмаланган инде.   

ТР Президенты Матбугат хезмәте, Елена Бритвина.

Бүген Татарстан Республикасы Премьер-министры Илдар Халиков  Кукмара муниципаль районында булды, анда ул Кукмара шәһәр тибындагы бистәсендә төзеләчәк Балалар иҗат йортының беренче нигез ташын салу тантанасында катнашты.

Илдар Халиковны  район башлыгы Сергей Димитриев, ТР мәгариф һәм фән министры урынбасары Лариса Сулима, Татарстан төзелеш, архитектура һәм торак-коммуналь хуҗалыгы министры урынбасары Илшат Гыймаев озата йөрде.

ТР Премьер-министры Илдар Халиков ассызыклаганча, Кукмара районы һәр ел саен яхшы нәтиҗәләр күрсәтә. “Кайсы гына тармакны алсак та, эшләрегез гөрләп бара. Мәгариф өлкәсендә республика күләмендә бишенче, ә авыл районнары арасында беренче булу – бу югары дәрәҗә. Авыл хуҗалыгында, сәламәтлек саклау өлкәсендә дә уңышларыгыз горурланып сөйләрлек. Яңа иҗат йорты балаларның талантларын барлау юнәлешендә күп еллар хезмәт итәр дип ышанам”, - диде ул.

Без республика программаларының барысында да катнашып киләбез. Быел да дүрт мәктәп төзекләндерелде, яңа мәдәният йортлары ачылды, тротуарлар, юллар ясалды. Авыл җирлекләрендә дә күп эш башкарыла, дип хәбәр итте Сергей Димитриев.

Аннан соң яңа социаль объектның нигез ташын салу тантанасы узды. Генераль подрядчы сүзләренчә, төзелеш эшләрен бер елдан төгәлләү планлаштырыла.

ТР Президенты матбугат хезмәте, Булат Низамиев. “Хезмәт даны” газетасы материаллары буенча.