ЯҢАЛЫКЛАР

Татарстан Республикасында күп фатирлы 198 йорт төзелә, бу – 2 млн кв. метр инвестицион торак. Шул ук вакытта, әлеге күләмнең төп өлеше (59%) эскроу-счетлар кулланып сафка бастырыла.

Бу хакта ТР Хөкүмәте йортында узган республика киңәшмәсендә ТР төзелеш, архитектура һәм ТКХ министры Марат Айзатуллин хәбәр итте.

Киңәшмәне барлык муниципаль берәмлекләр белән видеоконференцэлемтә режимында ТР Премьер-министры Алексей Песошин уздырды.

Министр хәбәр иткәнчә, 44 йорт – югары (70-100%), 68 йорт – уртача (30-70%), 86 йорт (0-30%) түбән әзерлек дәрәҗәсендә.

ТР Президенты каршындагы Дәүләт торак фонды тарафыннан социаль ипотека программасы буенча 265 мең кв. метрга исәпләнгән инвестиция программасы формалаштырылган, ягъни 4 мең 966 фатирлы 139 йорт.

2021 елда  гражданнарның аерым категорияләрен торак белән тәэмин итү буенча гамәлдәге дүрт программа нигезендә 636 ятим бала; 5 һәм аннан күбрәк бала тәрбияләүче 45 күп балалы гаилә; 48 яшь гаилә, шулай ук күчеп китәргә мәҗбүр булучылар, Ерак Төньяктан күченүчеләр һәм чернобыльчеләр арасыннан 9 кешегә (барлыгы 738 гаилә) фатир бирелергә тиеш.

2021 елда күп фатирлы торак йортларны капиталь ремонтлау программасында (Әлки, Әтнә, Чүпрәле һәм Кайбыч районнарыннан тыш) 41 муниципаль берәмлек катнаша. Программага гомуми мәйданы 5 млн 223 мең кв. метр булган 927 күп фатирлы йорт кертелгән.

2020 елда контроль-күзәтү органнары тарафыннан даими рәвештә төзелеш объектлары тикшерелә. Бер ел эчендә алар 1,5 меңнән артык була. Тикшерү нәтиҗәләре буенча гомуми суммасы 6 млн сумнан артык 141 карар чыгарылган.

ТР Президенты матбугат хезмәте, Елена Бритвина.

ТР Дәүләт төзелеш күзәтчелеге инспекциясендә Инспекциянең Көньяк-Көнчыгыш территориаль органының икенче разрядлы өлкән белгече Светлана Михайлованы лаеклы ялга озаттылар. Светлана Владимировна ведомствода 18 ел эшләгән. Инспекциягә нигез салынганнан бирле ул төзелеш объектларына кураторлык итә, үзен белемле белгеч итеп күрсәтә.

Коллектив исеменнән Светлана Владимировнаны инспекция җитәкчесе вазыйфаларын башкаручы И.Ф. Сафиуллин котлады һәм күпьеллык намуслы хезмәте өчен рәхмәт белдерде.

Светлана Михайлова төзелеш эшенә 20 елга якын хезмәт итә. Бүген дә ул ялга зур горурлык белән китә, тик Инспекциядәге тату коллективны юксынырга туры киләчәк. Ләкин аның өчен яңа тормыш сәхифәсе башлана, сәламәтлекне ныгытып, оныкларны тәрбияләү өчен җитәрлек вакыт мөмкинлеге барлыкка киләчәк.

Татарстан башкаласында 340 урынга исәпләнгән ике балалар бакчасы төзелеп беткән. Мәктәпкәчә яңа учреждениеләр Серов-Баруди урамында һәм Константиновка авылында («Светлая долина» ТК) урнашкан. 

Казан шәһәре буенча территориаль орган инспекторлары белем бирү объектларында тикшерү чаралары комплексын төгәлләде. Мәктәпкәчә учреждениеләргә янгын куркынычсызлыгы таләпләрен, санитар-эпидемиологик нормаларны үтәү, төзелеш-монтаж эшләрен башкару, инженерлык челтәрләрен монтажлау һәм янәшәдәге территорияне төзекләндерү буенча күзәтчелек органы белгечләре тарафыннан мониторинг үткәрелде. 

Ахыргы тикшерү нәтиҗәләре буенча мәктәпкәчә учреждениеләр Татарстан Республикасы Дәүләт төзелеш күзәтчелеге инспекциясеннән проект документлары таләпләренә туры килү-килмәү турында уңай бәяләмә алды. 

«Биналарда уен һәм йокы бүлмәләре, музыка һәм физкультура заллары, методик һәм медицина кабинетлары, шулай ук өстәмә һәм техник бүлмәләр җиһазландырылган», – дип хәбәр итте ТР Дәүләт төзелеш күзәтчелеге инспекциясе җитәкчесе вазыйфаларын башкаручы Илфарт Сафиуллин. 

Территориядә уен мәйданчыклары, күләгәле әвеслекләр урнашкан, төзекләндерү эшләре башкарылган.

Төзелеш «Демография» илкүләм проекты кысаларында башкарылган. 

Татарстанның Дәүләт төзелеш күзәтчелеге инспекциясе алдында сыйфатлы материаллар һәм конструкцияләр куллануны тәэмин итү, социаль инфраструктура объектларын төзегәндә һәм тапшырганда законнарны бозмау һәм расланган проект документларыннан тайпылышларга юл куймау бурычы тора.

Бүген, 26 декабрьдә, Татарстан Республикасының Дәүләт төзелеш күзәтчелеге инспекциясе Яр Чаллы шәһәренең 63 нче микрорайонында урнашкан 414 фатирлы яңа 21 номерлы торак йортка проект документларының туры килүе турында ярашлылык бәяләмәсе бирде. Йорт социаль ипотека республика программасы һәм «Торак һәм шәһәр мохите» илкүләм проекты буенча төзелгән.

Объектка ярашлылык бәяләмәсе бирелде. Бу исә аны файдалануга тапшыру һәм 414 гаиләгә көтеп алынган фатирларына күченү мөмкинлеген бирәчәк. 10 катлы бинаның гомуми мәйданы 30,2 мең кв. метр тәшкил итә. Йорт территориясе төзекләндерелгән, балалар өчен мәйданчыклар, тротуарлар каралган, эскәмияләр урнаштырылган, яшелләндерү эшләре башкарылган.

Татарстан Республикасының Дәүләт төзелеш күзәтчелеге инспекциясе коррупциягә каршы бюллетень чыгарды, анда «Коррупция бизнес-барометры» проекты турында сөйләнә.

Әлеге проект эшкуарлар арасында аноним сораштыру булып тора, ул һәр 6 ай саен үткәрелә. 1 декабрьдә тәмамланган сигезенче этапта 42 меңнән артык кеше катнашкан. Проект һәр төбәктә коррупциягә бәйле вәзгыятькә объектив бәя бирә.

Коррупциягә каршы бюллетеньнең яңа чыгарылышындагы сораштыру нәтиҗәләре турында тулырак мәгълүматны сылтама буенча укырга мөмкин: https://gsn.tatarstan.ru/rus/file/pub/pub_2626571.pdf

Бүген, 25 декабрьдә, Татарстан Республикасының Дәүләт төзелеш күзәтчелеге инспекциясе Казанның «Салават күпере» торак комплексында урнашкан 4-5 номерлы 255 фатирлы яңа торак йортка проект документларының туры килүе турында бәяләмә бирде. Йорт социаль ипотека республика программасы һәм «Торак һәм шәһәр мохите» илкүләм проекты буенча төзелгән.

Объектка ярашлылык бәяләмәсе бирелде. Бу аны файдалануга тапшырырга һәм 255 гаиләне көтеп алынган фатирларына күчерергә мөмкинлек бирәчәк. 18 катлы бинаның гомуми мәйданы 27,2 мең кв. метр тәшкил итә. Йорт территориясе төзекләндерелгән , балалар мәйданчыклары, тротуарлар каралган, эскәмияләр урнаштырылган, яшелләндерү чаралары башкарылган.

Бүген, 25 декабрьдә, Казанның «Салават күпере» торак комплексында төзелгән мәктәп төзелгән, үзгәртеп корылган капиталь төзелеш объектының проект документациясе таләпләренә, шул исәптән энергетика нәтиҗәлелеге таләпләренә һәм капиталь төзелеш объектының энергия ресурсларын исәпкә алу җайланмалары белән тәэмин ителү таләпләренә туры килүе турында Татарстан Республикасы Дәүләт төзелеш күзәтчелеге инспекциясеннән ярашлылык бәяләмәсе алды. Бу хакта ТР Дәүләт төзелеш күзәтчелеге инспекциясе башлыгы вазыйфаларын башкаручы Илфарт Сафиуллин хәбәр итте.

Бинаның гомуми мәйданы 24625,2 кв. метр тәшкил итә. Өч катлы мәктәп 1224 укучыга исәпләнгән. Проект нигезендә, белем бирү учреждениесе барлык заманча таләпләргә туры килә: яңа уку сыйныфларыннан тыш, мәктәп территориясендә өч физкультура-спорт зонасы, ике бассейн, актлар залы һәм башкалар җиһазландырылган.

Төзүче оешма тарафыннан төзелешнең тәмамлануы турында җибәрелгән хәбәр буенча ТР Дәүләт төзелеш күзәтчелеге инспекциясе инспекторлары Казан шәһәренең Серов-Баруди урамы буенча урнашкан «Западное Заречье»  торак районындагы яңа балалар бакчасында ахыргы тикшерүгә кереште. Объект «Демография» илкүләм проекты кысаларында төзелгән.

Күзәтчелек ведомствосы хезмәткәрләре мәктәпкәчә учреждениене башкарылган төзелеш-монтаж эшләренең проект документларына туры килүе-килмәвенә карата тикшерә. Тикшерү барышында янгын куркынычсызлыгы һәм санитария нормалары таләпләрен үтәүгә аерым игътибар бирелә.

Ике катлы мәктәпкәчә белем бирү учреждениесенең гомуми мәйданы 5168 кв. метр тәшкил итә.  Уңайлы төркемнәр, музыка һәм физкультура заллары булган заманча бина сәламәтлеге буенча мөмкинлекләре чикләнгән балаларның ихтыяҗларын исәпкә алып проектланган һәм лифт белән җиһазландырылган. Проектта инвалид балалар өчен урыннар булдыру каралган, уңайлы мохит нәтиҗәсендә алар башка балалар белән беррәттән балалар бакчасына йөри алачак.

Балалар бакчасы 1,5-7 яшьлек 340 баланы тәрбияләү һәм укыту өчен билгеләнгән. Сабыйлар 18 төркемгә бүленгән. Бинада уен бүлмәләре, буфетлар, йокы бүлмәләре, бәдрәфләр, шулай ук азык-төлек блогы, медпункт, ике универсаль түгәрәк бүлмәсе һәм персонал өчен кабинетлар урнашкан.

Тикшерү кисәтүләрсез узган очракта, объектка ярашлылык турында бәяләмә биреләчәк, бу төзүче оешмага балалар бакчасын файдалануга тапшырырга мөмкинлек бирәчәк.  

2020 елда Татарстан буенча «Демография» илкүләм проекты кысаларында 5030 урынга исәпләнгән 22 балалар бакчасын төзү планлаштырылган булган, шул исәптән 1,5-3 яшьлек балалар өчен – 2525 урын, 3-7 яшьлек балалар өчен – 2505 урын. 

Кукмара районының Иске Юмья авылында төзелгән яңа мәдәният йорты Татарстан Республикасы Дәүләт төзелеш күзәтчелеге инспекциясеннән проект документларының ярашлылыгы буенча уңай бәяләмә алды. Объект «Мәдәният» илкүләм проекты буенча төзелгән.

Проект нигезендә бер катлы бинада концертлар үткәрү өчен 200 кешегә исәпләнгән тамаша залы, китапханә, уен бүлмәсе һәм административ бүлмәләр бар.

Авыл мәдәният йортының гомуми мәйданы 412,7 кв. метр тәшкил итә. Бинада мөмкинлекләре чикләнгән кешеләр өчен пандуслар каралган.

Балык Бистәсе муниципаль районында төзелгән 50 урынлы яңа балалар бакчасы бүген Татарстан Республикасы Дәүләт төзелеш күзәтчелеге инспекциясеннән проект документларының таләпләргә туры килүе турында ярашлылык бәяләмәсе алды. Мәктәпкәчә учреждение республика бюджеты хисабына төзелгән.

Бина мәгариф учреждениеләренең барлык яңа таләпләренә дә туры килә. Биредә уен, йокы бүлмәләре, буфет һәм бәдрәф, шулай ук музыка һәм физкультура заллары бар. Бу хакта ТР Дәүләт төзелеш күзәтчелеге инспекциясе җитәкчесе Василий Кудряшов хәбәр итте.

Бинаның гомуми мәйданы 890,2 кв. метр тәшкил итә. Балалар бакчасы Биектау авылында Сафиуллин урамы буенча урнашкан.