ВАТАННЫ САКЛАУЧЫЛАР ЕЛЫ
«А в День Победы сходим с пьедесталов,
И в окнах свет покуда не погас,
Мы все – от рядовых до генералов –
Находимся незримо среди вас...»
Рәсүл Гамзатов
ТР Дәүләт төзелеш күзәтчелеге инспекциясендә эшләүче һәр хезмәткәр гаиләсендә Бөек Ватан сугышын узган туганнары бар. Якыннары турында Хокукый эш белән идарә итү һәм өлешле төзелешне контрольдә тоту идарәсенең административ практика бүлеге әйдәүче киңәшчесе Йолдыз Гафурова сөйли.
- Бөек Ватан сугышы, шул заманның күп кенә кешеләре кебек үк, минем туганнарымны да читләтеп үтмәгән. Минем бабам, Кәримов Әхәт Ярулла улы (1924–1987), күп балалы гаиләдә уникенче бала булып туган. Сугыш башлангач, бабай, ул вакытта әле унҗиде яшьлек егет, үз теләге белән фронтка китә. Көнбатыш фронтта генераллар Ватутин, аннары Рокоссовский командалыгындагы танк корпусында сугыша, аның белән Европага кадәр барып җитә. Үз часте белән күп кенә канкойгыч сугышларда, шул исәптән Курск дугасындагы тарихи сугышта катнаша, ул борылыш моменты була һәм хәрби хәрәкәтләрнең нәтиҗәсен билгели. Сугыш вакытында берничә тапкыр каты яралана, танкта яна, госпитальгә эләгә. Ләкин алган яраларына карамастан, һәрвакыт яңадан фронтка кайта, бөтен сугышны уза һәм Җиңү көнен Прагада каршылый. Сугышчан казанышлары өчен Кызыл Йолдыз ордены, Сугышчан Кызыл Байрак ордены, Ватан сугышы ордены һәм медальләр белән бүләкләнгән. Тыныч вакытта Татарстан өлкә һөнәр берлекләре советының социаль иминият бүлегендә эшли.
Минем әбием, Кәримова Мөнирә Исмәгыйль кызы (1923–2013), гаиләдә дүрт бала арасында иң олысы булган. 1941 елда урта мәктәпне тәмамлый, 21 июнь көнне чыгарылыш балы була. Ә икенче көнне, кичәге укучыларның барлык планнарын һәм өметләрен сызып ташлап, сугыш башлана. Әбием үз теләге белән ополчение отрядына китә. Үз отряды белән шәһәр янында оборона корылмаларын төзүдә катнаша. Билгеләнгән урынга кадәр җәяү баралар, юл берничә тәүлеккә сузыла. Азык-төлек, кием-салым җитми, елның теләсә кайсы вакытында чабата киеп йөриләр. Ләкин батыр ополчениеләр сугыш чорының барлык авырлыкларына түзеп, алга баралар. Отряд составында әбием республикабызның күп кенә районнарында булып, дошманның туган шәһәренә юлларын томалап, чокырлар һәм траншеялар казыган. «Тыл хезмәтчәне» медале белән бүләкләнгән. Сугыштан соң, 1947 елда экстерн булып Бөтенсоюз читтән торып уку юридик институтының Казан филиалын тәмамлагач, адвокатлык эшчәнлеге белән шөгыльләнә. Аннары Васильево бистәсендә халык судьясы вазыйфасын башкара. 1957–1984 елларда ТАССР Югары суды әгъзасы була.
Мин әби-бабаларым белән горурланам һәм аларны җылылык һәм ярату белән искә алам…
