Татарстан Республикасының Дәүләт төзелеш күзәтчелеге инспекциясе

Татарстанда торак йортларны капиталь ремонтлау буенча 4,7 млрд. сумлык эш башкарылган

2013 елның 10 ноябре, якшәмбе

Дәүләт торак инспекциясе мәгълүматларына караганда, Татарстанда торак йортларны капиталь ремонтлау буенча 4,7 млрд. сумлык эш башкарылган, бу барлык эшнең 99,9 процентын тәшкил итә. Бу хакта кичә республикакүләм киңәшмәдә ТР төзелеш, архитектура һәм торак-коммуналь хуҗалык министры Ирек Фәйзуллин белдерде.
ТР Президенты Рөстәм Миңнеханов видеоконференция элемтә режимында барлык муниципаль берәмлекләр белән киңәшмә үткәрде. Анда ТР Премьер-министрының беренче урынбасары Равил Моратов та катнашты.
Ирек Фәйзуллин искәрткәнчә, бүгенге көндә 841 күпфатирлы йортның 839 ында капиталь ремонт эшләре төгәлләнгән. Сарыф ителмәгән акча исәбенә өстәмә программага 82 күпфатирлы йорт кергән.
Хәзерге вакытта капиталь ремонт кысаларында 160 гомум белем бирү һәм 7 коррекцион мәктәптә төп эшләр төгәлләнгән, дип белдерде министр. Шул ук вакытта 8 гомум белем бирү һәм бер коррекцион мәктәптә сарыф ителмәгән акча исәбенә уку процессына зыян китерми торган ремонт эшләре дәвам итә.
2 контурлы котеллар урнаштыру программасы һәм 2013 елда Газлаштыру фонды кысаларында 4 009 фатирга җылылык системасы урнаштырылган. 2014 елда 5 332 фатирда шәхси җылылык системасына күчерү программасы бар.
2013 елда “Чиста су” программасы кысаларында 286,2 км су белән тәэмин итү системасы төзелгән. 106 торак пунктта һәм 45 муниципаль берәмлектә су белән тәэмин итү системасы яхшыртылган. Ирек Фәйзуллин сүзләренә караганда, 2014 елда 210 км суүткәргеч челтәре төзү, 24 скважина бораулау һәм 19 су башнясы кую планлаштырыла. 2015 елда бу эшне дәвам итү өчен 25 муниципаль берәмлектә 34 объектны проектлауга керешү зарур.
2014 елда Татарстанда бюджет учреждениеләренә җылылык бирү сыйфатын күтәрү программасын гамәлгә куюга керешәчәкләр. Моннан тыш, авылларда урамнарны яктырту программасы эшли башлаячак. И.Фәйзуллин белдергәнчә, бу программага бары тик авыл торак пунтклары гына керә.
ТР төзелеш, архитектура һәм торак-коммуналь хуҗалык министры Ирек Фәйзуллин ТКХ тармагы өчен кадрларны әзерләү программасы хакында белдерде. Бу программа республикада икенче елын эшли.
Министр муниципаль берәмлекләрдә күп функцияле үзәкләр өчен объектларны капиталь ремонтлау буенча эш барышы, авыл мәктәпләрендә җылы бәдрәфләр булдыру, ветеринария берләшмәләрендә капиталь ремонт, шулай ук “Уңай мохит” кысаларында гомуммәгариф учреждениеләрендә физик мөмкинлекләре чикләнгән затлар өчен 14 муниципаль берәмлектә 15 мәктәптә үткәрелгән чаралар турында белдерде, дип хәбәр итә ТР Президенты матбугат хезмәте.

"Татар-информ" МА

БАРЛЫК ЯҢАЛЫКЛАРНЫ УКУ