БРИКС илләре саммитында йомгаклау декларациясен кабул иттеләр
БРИКС илләре лидерлары хезмәттәшлекне һәм стратегик партнерлыкны киңәйтергә планлаштыралар, шулай ук берләшү әгъзалары һәм аларның сәүдә партнерлары арасында финанс операцияләре вакытында милли валюталарны куллануны хуплыйлар, диелә 2024 елның 23 октябрендә Казанда БРИКС саммиты нәтиҗәләре буенча кабул ителгән йомгаклау декларациясендә.
«Без БРИКС илләренең икътисадны глобаль торгызуга һәм тотрыклы үсешкә ирешү максатларында дөнья икътисады алдында торган проблемаларны хәл итүдә уртак эшенең мөһим ролен таныйбыз», – дип билгеләп үтелә документта.
Моннан тыш, БРИКС илләре лидерлары макроикътисадый сәясәтнең координациясен ныгытуга, икътисадый хезмәттәшлекне тирәнәйтүгә һәм ныклы, тотрыклы, баланслы һәм инклюзив икътисадый торгызуны тәэмин итү эшендә катнашуны раслый, шулай ук БРИКС икътисадый партнерлык стратегиясен гамәлгә ашыруны 2025 елга кадәр министрлар һәм эшче төркемнәр дәрәҗәсендә эшләүнең барлык профильле юнәлешләре буенча дәвам итү мөһимлеген ассызыклыйлар.
Шул исәптән БРИКСта катнашучылар дәүләтләр арасында сәүдә процедурасын гадиләштерергә килештеләр һәм яңа инвестицион платформа булдыруны хупладылар, ул Яңа үсеш банкы инфраструктурасын эшкә җигәчәк.
Геосәяси куркынычлар фонында финанс хезмәттәшлекне активлаштыру һәм бәйсез трансчик-депозитар BRICS Clear инфраструктурасын булдыру мөмкинлеген өйрәнү карарын кабул иттеләр. Финанс проблемаларын хәл итү өчен хәзерге халыкара финанс архитектурасын реформалаштыру кирәклегенә күрсәттеләр.
Шулай ук берләшмәнең валюта резервлары пулы кысаларында альтернатив валюталар куллануны хупладылар. Кимберлия процессы стандартлары буенча драгметаллар әйләнешен үстерәчәкләрен һәм технологияләрнең экспорт контроле өлкәсендәге диалогны киңәйтәчәкләрен белдерделәр.
БРИКС саммиты Казанда 22-24 октябрьдә узды. Бүгенге көндә оешмага ун ил керә: Бразилия, Россия, Һиндстан, Кытай, Көньяк Африка Республикасы, Мисыр, Иран, Берләшкән Гарәп Әмирлекләре, Согуд Гарәбстаны һәм Эфиопия. Тагын 24 дәүләт керү өчен чират тора.
