28 апрель – Бөтендөнья хезмәтне саклау көне
Халыкара хезмәт оешмасы (ХХО) 28 апрель көнне Бөтендөнья хезмәтне саклау көнен билгеләп үтә. Ул бөтен дөньяда эш урыннарында бәхетсезлек очракларын һәм авыруларны булдырмау максатыннан үткәрелә. Рәсәйдә 2026 елда Бөтендөнья хезмәтне саклау көне 24 нче тапкыр үткәрелә.
Хезмәт – ул безнең тормышыбызның аерылгысыз өлеше. Һәм безнең һәрберебез аның лаеклы түләнүен генә түгел, ә максималь куркынычсыз һәм уңайлы булуын тели.
2026 елда Бөтендөнья хезмәтне саклау көненең темасы – “Уңайлы психосоциаль эш мохите: хезмәткәрләрнең һәм көчле оешманың чәчәк атуына юл”.
Хәзерге дөньяда хезмәт шартлары физик, химик яки биологик факторлар белән генә билгеләнми. Персоналның иминлегенә, сәламәтлегенә һәм җитештерүчәнлегенә төп йогынтыны психосоциаль мохит күрсәтә.
Ул эшнең ничек проектлануы, оештырылуы һәм идарә ителүе йогынтысында формалаша: эш йөгенең режимы һәм интенсивлыгы, вазыйфаи рольләрнең ачыклыгы, автономия дәрәҗәсе, идарә процессларының хуплануы һәм гаделлеге.
Бу факторлар тискәре характер ала башлагач, алар мәҗбүри рәвештә ачыкланырга һәм традицион янаулар белән беррәттән контрольгә алынырга тиешле җитештерү куркынычларына әверелә.
Бөтендөнья хезмәтне саклау көне алдыннан Татарстанда ел саен эш урынында куркынычсызлык һәм сәламәтлек мәсьәләләренә багышланган фәнни-гамәли конференцияләр, түгәрәк өстәлләр, семинарлар, тренинглар, квалификация күтәрү курслары, эксперт консультацияләре, презентацияләр һәм күргәзмәләр уза.
