Чаллыда тагын бер яңа социаль ипотека йорты төзелде
ТР Дәүләт төзелеш күзәтчелеге Чаллы шәһәренең 69нчы микрорайонында урнашкан 69-17нче торак булмаган биналары булган яңа торак йортка күчмә тикшерү үткәрә.
Ведомствоның Төньяк-Көнчыгыш территориаль органы инспекторларының тикшерү предметы – проект документациясе таләпләренә туры килергә тиешле барлык тәмамланган төзелеш эшләре.
Тикшерү кысаларында шулай ук санитар-эпидемиологик чаралар, янгын куркынычсызлыгы, әйләнә-тирә мохитне саклау, халыкның аз хәрәкәтләнүче төркемнәре өчен файдалану мөмкинлеген тәэмин итү буенча чаралар үтәлеше тикшерелде.
Тышкы инженерлык челтәрләре булган эре панельле бер подъездлы торак йорт төзелеше 2023 елның февралендә башланган. Андагы катлар саны – 18. Манара тибындагы бинаның мәйданы 13261,17 кв. м тәшкил итә.
Булачак яшәүчеләр өчен гомуми мәйданы 8317,80 кв. м булган 170 фатир төзелгән. Шулардан бер бүлмәлеләр – 68, кухня-куышлы бер бүлмәлеләр – 34, ике бүлмәлеләр – 51, өч бүлмәлеләр – 17. Йорт яны территориясендә 153 машина урынына исәпләнгән автостоянка бар.
Капиталь төзелеш объектларын төзүче булып «Татарстан Республикасы Рәисе каршындагы Дәүләт торак фонды» коммерциясез оешмасы тора.
Техник заказчы – «Татарстан Республикасының Баш инвестиция-төзелеш идарәсе» дәүләт казна оешмасы.
Генераль подрядчы – «Домкор Строй» ҖЧҖ.
Йорт социаль ипотека республика программасы кысаларында төзелгән, бу «Торак һәм шәһәр мохите» илкүләм проектының төп максатына – гражданнарыбызны арзанлы һәм сыйфатлы торак белән тәэмин итүгә ирешергә мөмкинлек бирәчәк.
