ТР Дәүләт төзелеш күзәтчелеге инспекциясендә Бөтендөнья хезмәтне саклау көненә багышланган семинар узды
2023 елның 18 апрелендә ТР Дәүләт төзелеш күзәтчелеге инспекциясе «Бөтендөнья хезмәтне саклау көне» темасына семинар үткәрде. Быел ул «Имин һәм сәламәт эш мохите – хезмәт өлкәсендә төп принцип һәм хокук» шигаре астында уза.
Чарада ТР ДТК инспекциясенең Казан шәһәре буенча капиталь төзелеш объектларын төзелешенә һәм үзгәртеп корылышына күзәтчелек буенча территориаль орган җитәкчесе Д.А. Мильгунов, ведомство хезмәткәрләре катнашты. Төп доклад белән Казан шәһәре буенча ТО 5нче бүлеге консультанты К.В. Козырев чыгыш ясады.
Докладта билгеләп үтелгәнчә, ТР Дәүләт төзелеш күзәтчелеге инспекциясе, аңа йөкләнгән бурычларны үтәү кысаларында, республика төзелеш объектларында хезмәтне саклау, төзелеш куркынычсызлыгы һәм төзелеш мәйданчыкларын оештыруның билгеләнгән нормативларга туры килү таләпләре үтәлешен күзәтә.
Административ йогынты чараларыннан тыш, ТР ДТК инспекциясе ТР Төзелеш, архитектура һәм ТКХ министрлыгы каршындагы хезмәтне саклау буенча ведомствоара комиссия эшендә дә катнаша, анда республика оешмалары һәм предприятиеләре вәкилләре белән хезмәтне саклау мәсьәләләре буенча семинар-киңәшмәләр үткәрелә.
Төзелеш тармагы һәрвакыт югары куркынычларга ия булуы белән характерлана. Төзелештә производствода имгәнү дәрәҗәсе һәрвакыттагыча югары. Төзелеш эшләрен башкару хезмәткәрләр өчен куркыныч факторлар белән бәйле. Көн саен төзелеш оешмалары хезмәткәрләре куркыныч процессларны башкарырга тиеш, әйтик:
- биеклектәге эшләр;
- электр коралын куллануга бәйле процесслар;
- йөкләрне төяү, бушату һәм авыр йөкләрне бер урыннан икенче урынга күчерү;
- автомобильләр һәм авыр махсус техника кулланып эшләү;
- югары, түбән температура яки уңайсыз һава шартлары тәэсирендә вазыйфа бурычларын үтәү;
- агрессив химик матдәләр белән элемтәгә керү;
- тавышлы эшләр яки эш зонасы һавасының тузанлылыгы арткан шартларда эшләү;
- физик һәм нерв киеренкеленең артуы.
Үз чыгышында К.В.Козырев җитештерүдәге имгәнүләрнең сәбәпләрен әйтеп китте. Төп очраклар булып биеклектән егылып төшү, кеше өстенә авыр әйберләр егылып төшү яки конструкцияләрнең ишелүе, электр тогы белән зарарлану һәм җиһазларның төзексезлеге нәтиҗәсендә җәрәхәтләр алу тора. Бу төзелеш предприятиеләре хезмәткәрләренең үз иминлеге мәсьәләләренә формаль мөнәсәбәте турында сөйли. Кайвакыт бәхетсезлек очракларының сәбәбе персоналның ваемсызлыгы булырга мөмкин, бу турыдан-туры төзелеш мәйданчыгында үз-үзеңне тотуның элементар кагыйдәләрен белмәү белән бәйле һәм предприятие җитәкчелегенең җитешсезлеге булып тора.
Оешмадагы барлык персоналның шәхси һәм җәмәгать иминлеге кагыйдәләре белән танышуы, аларны бозудан килеп чыккан нәтиҗәләрне аңлавы бик мөһим. Эштә куркыныч булырга мөмкин булган төрле моментларны белү очраклы һәм сәбәпсез җәрәхәтләр барлыкка килү куркынычын киметәчәк, шулай ук барлык эш процессларының куркынычсызлык дәрәҗәсен арттырачак.
Шулай ук ТР ДТК инспекциясе хезмәткәрләре тарафыннан тикшерүләр барышында түшәмәләр түшәүгә аерым игътибар бирелә, чөнки тикшерүләр барышында иң авыр нәтиҗәләргә китерә торган төрле хокук бозулар ачыклана.
Мондый бозулар арасында түбәндәгеләрне аерып күрсәтергә кирәк:
- түшәү чаралары (төзелеш баскычлары) куркынычсызлык таләпләренә туры килми, атап әйткәндә: такталар арасында 5 мм артык бушлык булган эш түшәмәләре бар, түшәмәләр төзелеш баскычларына беркетелми, кимендә 0,15 м борт элементы, түшәмәләрнең тотына торган һәм борт коймасы юк, һәр парның ахырында аркылы торышта кимендә 5 см калынлыгындагы тактадан тоташ (киселмәгән) кыстыргыч куелмый;
- төзелеш баскычларын бина диварларына фактик беркетү аларны беркетү киңәшләренә туры килми һәм аларның ныклыгын тәэмин итми.
Югарыда күрсәтелгән факторларда эштә имгәнү куркынычын киметү һәм булдырмау өчен эш бирүчеләр теләсә кайсы объектны төзүдә (реконструкцияләүдә, модернизацияләүдә, капиталь ремонтлауда) хезмәтне саклау гамәлдәге таләпләргә ярашлы рәвештә гамәлгә ашырылачак чаралар комплексын эшләргә һәм кертергә тиеш.
Бу юнәлештәге эшләрне төзелеш компанияләре төзелешне оештыру проектларын (ПОС) һәм эшләрне башкару проектларын (ППР) эшләү стадиясендә үк башларга тиеш.
Төзелешне оештыру проекты хезмәтне саклауның норматив таләпләре үтәлешен тәэмин итүче техник чараларны һәм эш ысулларын билгеләү буенча чаралар һәм проект чишелешләре исемлеген үз эченә ала. Шулай ук проектта эшләрне башкару ысуллары буенча тәкъдимнәр, капиталь төзелеш объектларын яки аларның аерым элементларын төзегәндә эшләрнең технологик эзлеклелеге, төзелеш мәйданчыгын оештыру, янгынга каршы, санитар-гигиена, экологик, террорчылыкка каршы чаралар күрсәтелә, эшләрнең төп төрләрен башкаруга карата куркынычсызлык таләпләре тасвирлана.
Контроль-күзәтчелек чараларын үткәргәндә ТР ДТК инспекциясе хезмәткәрләре тарафыннан төзелешне оештыру проектында күрсәтелгән таләпләрне үтәүгә игътибар бирелә. Бу барлык төзелеш төрләрендә кулланыла торган төп оештыру-технологик документ. Аны эшләү өчен нигезләрнең берсе булып РФ Хөкүмәтенең «Проект документациясе бүлекләре составы һәм аларның эчтәлегенә карата таләпләр турында» 16.02.2008 ел, №87 карарының 23 пункты тора. Әлеге проект таләпләрен үтәү төзелештә катнашучыларның барысы өчен дә мәҗбүри.
Семинарда катнашучылар алдында шулай ук Казан шәһәре буенча ТО 5 нче бүлеге консультантлары Д.А. Вальщиков, Л.Г. Галимова, Казан шәһәре буенча ТО 5 нче бүлегенең өлкән белгече В.Х. Кәбиров чыгыш ясады. Алар электр куркынычсызлыгы, санитар-эпидемиологик, производствода янгын куркынычсызлыгы мәсьәләләренә кагылдылар. Семинар барышында тематик видеоматериаллар, мәгълүмати һәм агитация плакатлары, махсус кием һәм башка шәхси саклану чаралары күрсәтелде.
Исегезгә төшерәбез, 2023 елның 1 апреленнән 1 июненә кадәр Татарстанда Бөтендөнья хезмәтне саклау көненә багышланган чаралар узачак. ТР Министрлар Кабинетының 22.03.2023 ел, № 711-р боерыгы нигезендә, әлеге тәкъдим җәмәгатьчелек игътибарын хезмәтне саклау мәсьәләләренә җәлеп итү, производствода бәхетсезлек очракларын һәм һөнәри авыруларны булдырмау, шулай ук хезмәт культурасын республика эшчәнлегенең барлык өлкәләренә чыгару максатында ТР Хезмәт, халыкны эш белән тәэмин итү һәм социаль яклау министрлыгы тарафыннан тәкъдим ителгән.