Юлларны төзү һәм ремонтлау темплары буенча Татарстан лидер төбәкләрнең берсенә әверелде

Татарстан Республикасы “Ышанычлы һәм сыйфатлы юллар” федераль проектын тормышка ашыру буенча Россиянең лидер төбәкләре исәбенә кергән.

Татарстан башлыгы Рөстәм Миңнеханов бүген, 6 декабрь көнне, әлеге проектны тормышка ашыруга багышланган киңәшмәдә катнашачак. Утырыш Мәскәүдә Россия премьер-министры Дмитрий Медведев җитәкчелегендә узачак. Бу хакта ТР башлыгы матбугат хезмәтенә сылтама итеп, “Татар-Информ” агентлыгы хәбәр итә.

Әлеге программа 2025 елга кадәр исәпләнгән, ә 2017 елда аны тормышка ашыру өчен 65 миллиард сумнан артык акча бүлеп бирелгән. Хәзерге вакытта агломерацияләрдәге юлларның 52%ыннан артыграк өлеше заманча норматив таләпләренә җавап бирә. 2025 елга бу күрсәткеч 85% дәрәҗәсенә ирешергә тиеш.