Чаллыда православие гимназиясе төзелде
ТР Дәүләт төзелеш күзәтчелеге инспекциясе Чаллыдагы Изге Георгий Победоносец храмы территориясендә гимназия төзелешенең 1 нче чиратын төзүчегә объектның проект документациясе таләпләренә туры килүе турында бәяләмә бирде.
Күзәтчелектәге объект төзелеше 2020 елның июнендә башлана. Аның бинасы кирпечтән, мансардалы һәм цоколь этажлы дүрт катлы. Фундамент тибы – субайлы, түбә тибы – иңкүле. Гомуми мәйданы 2890,10 кв. м.
Беренче катта, бинаның көньяк-көнбатыш ягында, санузеллар һәм рекреация белән башлангыч мәктәпнең уку сыйныфлары урнашкан. Төньяк-көнчыгыш ягыннан – укучыларның гардероблары, санузеллар, халыкның аз хәрәкәтләнүче төркемнәре өчен санузел (МГН), медицина блогы.
Икенче катта шулай ук уку сыйныфлары, шул исәптән лаборантлар белән химия, физика һәм биология кабинетлары, ИЗО кабинеты һәм 8 кеше сыйдырышлы ике компьютер сыйныфы урнашкан. Санузеллар һәм хәрәкәте чикле кешеләр өчен санузел каралган.
Бинаның үзәк өлешендә рекреацион үзәк урнашкан. Төньяк-көнчыгыш һәм көньяк-көнбатыш яклардан спорт залына һәм актлар залына күчү каралган, алар төзелешнең 2 нче чираты барышында төзеләчәк.
Мансард катында директор, настоятель, завуч, логопед, психолог кабинетлары, уку залы белән китап саклагыч бар.
Төзүче булып «Рус Православие Чиркәвенең Чаллы епархиясе (Мәскәү патриархаты)» дини оешмасы тора. Техник заказ бирүче – «Стройпроект инжиниринг» ҖЧҖ. Проектлаучы – «Каминвестгражданпроект» ҖЧҖ.
