Чаллыда 340 урынга исәпләнгән «Сандугач» балалар бакчасы төзелде
Чаллы шәһәренең 69нчы микрорайонында урнашкан 132нче «Сандугач» балалар бакчасы ТР Дәүләт төзелеш күзәтчелегенең йомгаклау тикшерүен уза.
Балалар бакчасының яңа ике катлы бинасы 2022 елның декабрендә төзелә башлаган. Аның мәйданы – 5168 кв.метр һәм ул 340 урынга исәпләнгән.
Биредә мәктәпкәчә яшьтәге балаларны гомуми үстерү һәм тәрбияләү өчен барлык шартлар да каралган. Учреждение территориясе төзекләндерелгән.
Объектны төзүче һәм техник заказ бирүче – «Татарстан Республикасының Төп инвестиция-төзелеш идарәсе» ДКУ. Генераль подрядчы – «Твой дом» төзелеш компаниясе ҖЧҖ.
Йомгаклау тикшерүе тәмамлангач, искәрмәләр булмаса, төзүчегә проект документациясе таләпләренә туры килүе турында бәяләмә биреләчәк. Аннары 132нче «Сандугач» балалар бакчасы файдалануга тапшырылачак.