Илкүләм проектларны гамәлгә ашыруга 105 объект кертелгән
Татарстан Республикасы Хөкүмәте Йортында узган киңәшмәдә Татарстан Республикасы төзелеш, архитектура һәм ТКХ министры Марат Айзатуллин илкүләм проектларны гамәлгә ашыру турында мәгълүмат бирде. Бүгенге көндә аларга 12 федераль проект буенча 105 төзелеш һәм ремонт объекты кертелгән. Профильле федераль министрлыклар һәм ведомстволар белән килешүләр төзелгән.
Киңәшмәне барлык муниципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды. Анда Татарстан Премьер-министры Алексей Песошин катнашты.
«Торак һәм шәһәр мохите» илкүләм проекты паспортына 37 объект кертелгән.
«Уңайлы шәһәр мохитен формалаштыру» проекты буенча 27 җәмәгать киңлеген яңартырга кирәк. Тагын 6 территория, «Кече шәһәрләр һәм тарихи җирлекләр» конкурсында җиңеп, төзекләндереләчәк.
«Чиста су» федераль проекты буенча бу елда Нурлат өчен су алу узелы булган су белән тәэмин итү системасын төзү планлаштырыла.
«Экология» илкүләм проекты буенча «Иделне савыктыру» федераль проекты кысаларында ләм кырларын рекультивацияләү һәм Казанда биологик чистарту корылмаларын реконструкцияләү эшләрен дәвам иттерү планлаштырыла. Биологик чистарту корылмаларын реконструкцияләү буенча контракт гыйнвар аенда төзелгән, төзү-монтаж эшләре 27% башкарылган. Күчмә объект – Казанда Самосырово полигонын рекультивацияләү эшләре дәвам итә, ул «Чиста ил» федераль проекты буенча гамәлгә ашырыла.
«Заманча мәктәп» федераль проектының «Мәгариф» илкүләм проекты нигезендә Тукай районында 100 урынга исәпләнгән мәктәп төзү каралган. Республиканың Апас һәм Баулы районнары мәктәпләрендә 2 спорт залын капиталь ремонтлау каралган. Алар «Һәр баланың уңышы» федераль проектына кертелгән.
«Сәламәтлек саклау» илкүләм проекты һәм аңа керә торган «Беренчел звеноны модернизацияләү» федераль проекты нигезендә эшләр ике юнәлеш буенча алып барылачак. Беренчесе – 29 фельдшер-акушерлык пункты төзеләчәк. Икенчесе – үзәк район хастаханәсенең 20 бинасын капиталь ремонтлау һәм реконструкцияләү күздә тотыла.
«Демография» илкүләм проекты буенча 2022-2023 еллар дәвамында бер объект – Казанда балалар бакчасы төзеләчәк.
«Туризм һәм кунакчыллык индустриясе» илкүләм проекты кысаларында Югары Ослан районында «Түбәтәй тауэр» объекты янындагы территорияне төзекләндерү планлаштырыла.
Моннан тыш, республиканың Төзелеш министрлыгы катнашында 2022 елда 5 дәүләт программасы гамәлгә ашырылырга тиеш, аларга барлыгы 102 объект керә. Иң күп эш «Мәгарифне үстерү» дәүләт программасы кысаларында башкарылачак – бер ел эчендә 66 гомуми белем бирү оешмасында капиталь ремонт үткәрергә кирәк.
«Мәдәниятне һәм туризмны үстерү» программасы кысаларында Чаллыда «Мастеровые» рус драма театры төзелеше дәвам итәчәк.
Авыл территорияләрен комплекслы үстерү буенча чаралар исемлегенә 16 объект буенча эшләр кертелгән. Бу – инженерлык челтәрләренең 5 объектын модернизацияләү, 3 мәгариф объектын төзү һәм бер авыл мәдәният йортын ремонтлау, комплекслы торак төзелеше өчен 7 мәйданчыкны төзекләндерү.
«Су хуҗалыгы комплексын үстерү» дәүләт программасы Кама тамагында Куйбышев сусаклагычының ярларын ныгыту эшләрен үз эченә ала. Эшләрнең әзерлек этабы агымдагы елның апреленә билгеләнгән. Шулай ук сулыкларда 14 гидротехник корылманы ремонтлау планлаштырылган.
«Ватанны саклаганда һәлак булганнарның истәлеген мәңгеләштерү» программасы буенча республикада 4 хәрби каберлекне торгызырга кирәк.
Аннары министр хезмәт сагы өлкәсендәге чаралар турында сөйләде. Бу эш өзлексез режимда алып барыла. Ел башыннан ТР Дәүләт төзелеш күзәтчелеге инспекциясе төзелеш мәйданнарында 39 тикшерү үткәрде, үзкөйләнешле оешмаларга карата 143 тикшерү үткәрелде. Баш инвестиция-төзелеш идарәсе үз мәйданнарында 286 контроль-күзәтчелек чарасын оештырган. Ачыкланган җитешсезлекләр оператив рәвештә бетерелә: ел башыннан төзелеш мәйданнарында ачыкланган 68 хокук бозу очрагының 58е бетерелгән.
ТР Президенты матбугат хезмәте