Татарстанның Кукмара районында мегаферма эшли башлаячак
2 августта Татарстан Республикасының Дәүләт төзелеш күзәтчелеге инспекциясе «Вахитово» җаваплылыгы чикләнгән җәмгыятенең, ягъни 900 баштан күбрәк терлеккә исәпләнгән сөт-товар фермасын төзүченең проект документларына туры килүе турында ярашлылык бәяләмәсе бирде. Объектның проектчысы – «Инжиниринг» җаваплылыгы чикләнгән җәмгыяте проект төзүче компаниясе.
Хәзерге вакытта төзелешнең икенче этабы тәмамланган. Комплекс ике сыер абзарыннан, сөт саву блогыннан, тирес чыгару җайланмасыннан, санитар тикшереп кертү постыннан һәм терлекләр тоту һәм сөт җитештерү өчен кирәкле башка корылмалардан тора. Проектта шулай ук һәр сыер абзарының ян-яктагы озынча стеналарына күтәрелмәле-төшерелмәле панельләр аша кергән тышкы һава агымы белән эшли торган табигый вентиляция схемасын беркетү дә планлаштырылган. Яңа терлекчелек мегафермасы бер елга 8640 тонна сөт җитештерәчәк, бер сыердан уртача 9000 литр сөт савып алыначак дип көтелә. Ул Татарстанның перспектив планына кертелгән 24 сөтчелек комплексының берсе булачак.
Сөт терлекчелеге – Татарстан икътисадының төп юнәлешләреннән берсе, һәм, фаразлар буенча, әлеге тармак киләсе елларда үсеш ноктасы булып торачак. Димәк, Татарстан Республикасы Авыл хуҗалыгы һәм азык-төлек министрлыгы мәгълүматларына караганда, бүгенге көнгә авыл хуҗалыгы оешмалары һәркөнне 3850 тоннадан артык сөт савып ала, аны сатудан 102 млн сумга якын табыш керә. 2021 елның беренче яртыеллыгы нәтиҗәләре буенча, терлекчелек өлкәсендә 721 мең тонна сөт җитештерелгән, сыерларның җитештерүчәнлеге 4%ка арткан.