ЯҢАЛЫКЛАР

Бүген Татарстан Республикасы Президенты Рөстәм Миңнеханов Казанда Галиәсгар Камал исемендәге Татар дәүләт академия театрында булды.

Рөстәм Миңнеханов театр бинасы янәшәсендәге мәйданны, шулай ук театр  фойесын һәм балконнарын карады.

Татарстан Президентына Галиәсгар Камал исемендәге Татар дәүләт академия театрын реконструкцияләү вариантларын тәкъдим иттеләр. Реконструкция беренче чиратта театрның өстәмә мәйданнарын булдыру өчен ясала, шулардан – репетицияләр залы, шулай ук җитештерү бүлмәләре.   

Проектлар буенча аңлатмаларны театрның баш режиссеры Фәрит Бикчәнтәев һәм проектлаучы компания вәкилләре биреп барды.

Театрның Кабан күле буенда урнашкан хәзерге бинасы – советлар чоры постмодернизмы үрнәге. Реконструкция проекты шуңа күрә биеклеге буенча   чикләнгән.   

Рөстәм Миңнеханов билгеләп үткәнчә, бүген республикага реконструкциянең   функциональ проекты кирәк, ул конкрет бурычларны хәл итәргә тиеш –репетицияләр һәм җитештерү базаларын киңәйтергә. Моннан тыш, диде Рөстәм Миңнеханов, бинаны тамашачылар һәм актерлар труппасы өчен уңайлы булсын өчен, чыннан да, тәртипкә китерергә кирәк.

Бинаның кыяфәтен, стилистикасын саклап калу да мөһим, диде Татарстан  Президенты. Аның фикеренчә, ландшафт һәм әйләнә-тирә мохит  үзенчәлекләрен дә исәпкә алырга – чөнки театр Кабан күле буенда урнашкан.

«Бүген булган нәрсәләребезнең кадерен белергә кирәк, – диде Рөстәм Миңнеханов, – Камал театры халыкка кирәк, тамашачылар аңа теләп йөри. Театр бинасы исә шәһәр архитектурасын бизи, хәзер Казанны һәм Кабан күле яр буен мондый үзенчәлекле түбәле бинадан башка күз алдына да китереп булмый».

Реконструкция проекты буенча фикер алышуларда Татарстан Республикасы Президенты ярдәмчесе Ләйлә Фазлыева һәм Наталия Фишман, Татарстан Республикасы җир һәм мөлкәт мөнәсәбәтләре министры Азат Хамаев, Татарстан Республикасы төзелеш, архитектура һәм ТКХ министры Ирек Фәйзуллин, Казан шәһәре мэры Илсур Метшин, Казанның баш архитекторы Татьяна Прокофьева, театр җитәкчелеге вәкилләре катнашты.

Азакта Рөстәм Миңнеханов һәм аны озата йөрүче затлар Камал театры  каршындагы мәйданнан алып Кабан күле яр буйларын карап чыктылар.   

ТР Президенты Матбугат хезмәте

Татарстанда 2016 елда социаль ипотека программасы буенча 193 торак йорт төзелеше планлаштырылган. Бу хакта бүген Татарстан Республикасы Министрлар Кабинетында узган брифингта ТР төзелеш, архитектура һәм ТКХ министры Ирек Фәйзуллин хәбәр итте.

Бүгенге көндә республиканың төзелеш комплексында 105 мең төзүче бар. Бу зур армия, ул тулай төбәк продуктының 10%ын тәэмин итә, дип ышана спикер.

ТР Президенты каршындагы Дәүләт торак фонды төрле юнәлешләр буенча программаларны гамәлгә ашыра. Социаль ипотека программасы буенча быелга 9554 фатирга 193 торак йорт төзелеше планлаштырылган. Бүген 59 торак йорт файдалануга тапшырылган. Барлыгы социаль ипотека программасы буенча 2005 – 2015елларда гомуми мәйданы 5 млн 897 мең кв. метр булган 90 мең 846 фатир төзелгән.

Шулай ук республикада күп фатирлы торак йортларны капиталь ремонтлау программасы тормышка ашырыла. Быел 4 млрд 725 млн сумга 830 йортны ремонтлау планлаштырылган.

Ирек Фәйзуллин салынганына 30 елдан арткан мәктәпләрне ремонтлау төгәлләнеп килә, дип өстәде. Узган елдан шундый ук балалар бакчаларын ремонтлау программасын гамәлгә ашыру башланды.

Мәгариф оешмаларына килгәндә, спикер билгеләгәнчә, республикада быел 95 мәктәп, 53 балалар бакчасы ремонтлана.

ТРның Тәтеш, Чистай, Кукмара, Спас, Әлки, Әлмәт, Мөслим, Алабуга, Яшел Үзән районнарында 9 балалар сәламәтләндерү лагерьларында ремонт уздырылган.

Мәдәни билгеләнештәге объектларны ремонтлау программасына 43 авыл клубы кертелгән, 34 объектта эшләр төгәлләнгән.

Узган ел ТР муниципаль берәмлекләрнең  авыл советлары биналарын ремонтлау башланды, дип өстәде министр. 43 районда 78 авыл советы бинасын ремонтлау төгәлләнеп килә.

ТР Авыл хуҗалыгы һәм азык-төлек министрлыгы объектларын ремонтлау буенча эшләр дәвам итә.

“Татар-информ” МА